由博思會建立的《繪本童思：博思會學前語文課程》(《繪本童思》)，以語言及識字能力兩大範疇為基礎，由淺入深編排學習內容，讓幼兒透過閱讀繪本及相關的遊戲活動，建立讀寫的基礎能力。
因應近年疫情對兒童學習的影響，博思會教育心理學家招麗儀女士聯同香港中文大學的專業教育心理學文學碩士課程學員梁倩子小姐及吳綽康先生，製作《繪本童思．家長學習短片系列》，讓家長或幼兒工作者都可以透過短片系列認識善用繪本及相關活動的技巧，有糸統及有效地支援幼兒學習語文。
此外，招麗儀女士、梁倩子小姐及吳綽康先生亦會於2022年12月8日舉行的「學與教博覽2022」的研討會上與業界分享成果，期望當中的技巧得到更廣泛的應用。
《繪本童思．家長學習短片系列》全套9集已上載於博思會YouTube 頻道喇！即刻就去我們YouTube頻道 先睹為快啦！
繪本童思話你知
近年SEN學生受到不少關注，當中有不少是看不到的障礙，讀寫障礙便是其一。
從事特殊學習需要教育的英文老師丁元春笑說：「讀寫障礙不是不讀書的藉口，只是需要多點時間找出適合的學習方法。
我們不是step by step，而是toe by toe，逐少慢慢建立學習的意識，最緊要幫學生找回成功感。」
有位女大專生小時候被診斷為讀寫障礙、專注力不足和過度活躍，卻在中小學期間拿下逾50次全港朗誦或演講比賽的獎項，完全打破坊間對特殊學習需要學生的既有印象。
博思會資深英文老師丁元春指，「家長先要接受事實，更加不要將讀寫障礙無限放大，無形中小朋友都會嚇怕，以為自己讀不到書，升不了班。有些中學生更會認為升不到大學，將來生活好難安穩，感到好徬徨。」
讀寫障礙不是病
多年來丁老師接觸不少讀寫障礙學生和家長，她無奈指有些是瞞着家人偷偷前來的，最怕從此被標籤。「不少人對讀寫障礙仍然有很多誤解，會問幾時先醫得好。這個不是病，是天生的神經系統問題，只能以不同方法來處理，絕對不是醫治。」她認為讀寫障礙就如近視，並不是病，佩戴眼鏡就可以，只要用對方法便能解決問題。
我手寫我心，對一般人來說是自然而然的事，其實當中牽涉很多步驟，包括語音處理、視覺及聽覺認知能力、列序或組織能力等。丁老師說：「我們習慣將文字變回聲音，聲音在腦中才有意思，之後再用手寫出來，如果其中一個步驟的運作慢些或卡着，便形成障礙。」
丁老師就如偵探一樣，找出學生的讀寫問題，如從中文的形音義、英文的拼音着手，包括分不清b或d、混淆意思相近的字詞等，再逐一擊破。
「當長大了，就要學懂使用應對方法來解決，如記憶力弱，可用圖像分析、分類等來協助。他人在幫你的時候，自己都要慢慢建立一套適合自己的方法。」就如朗誦得獎的小女生記憶力弱，其他同學15分鐘就能背好的朗誦內容，她可能需要3小時才背好。小女生漸漸發覺死記硬背行不通，便用故事形式來理解文章，即時入腦得多。
正面成長心態
讀書障礙只是解釋，不是不讀書的藉口。丁老師說：「成長心態好重要，不要因為自己是讀寫障礙，就理直氣壯地不讀書，自我劃地為限。」就如博思會以迷宮為標誌，學生要懂得山不轉路轉。「前面既然是牆，點解要一直向前撞，不會轉彎呢？可能向右移一步就是大門。」
不時跟家長會面時，丁老師總感到他們背負的沉重壓力和無力感，皆因小學每周必備的默書最能見真章。「點解溫極都唔識、點解唔記得、就算溫得好熟，第二朝又唔記得，或者默出來甩甩漏漏，又唔係全個字形無，而是少咗筆劃，對形音義掌握得好差。」
丁老師建議家長先認同和諒解學生的難處，舉例如寫韓文就似畫符號一樣，即使韓文是拼音文字，看不懂自然讀不出來，更何況要默寫出來。「語文是基本學習工具，無工具又點學其他知識，自然無心機讀書。」
理解讀寫難處
一般人不明白何謂對字詞的不理解，如「我今日好開心」，在某些讀寫障礙學生眼中會變成「我今」、「日好」等難以理解的詞。丁老師無奈道：「這已經不是『睇得多就知，聽得多就明』的問題。當字詞愈來愈多，或者小朋友長大了不好意思開口，可能連最簡單的字詞都看不明白。」
家長不妨將學習標準稍作調節，如老師要默寫10個詞語，若讀寫障礙學生能背好5個詞，亦可視之為滿分，從中為學生建立成功感。「成長需要時間，他們不是低IQ，不是懶、不肯讀，只要找出對的方法。」
有位碩士畢業的女生從小默書總是零分，但她很努力溫習，付出跟成果完全不成正比，直到中七那年得知有讀寫障礙，多年來的零分之謎終於解開。幸好她學習生涯中遇上不少良師，肯定她的思辨能力和說話技巧，即使事倍功半也能咬緊牙關堅持下去，後來慢慢學會借助書本的錄音版本來幫助閱讀，當遇上挫折或被誤解時，更會勉勵自己「不理解是常態」，以樂觀性格迎接挑戰。
作者：劉妙賢
責任編輯：李越樺
今次介紹的「猜猜看」，家長可以借助家中的物件讓小朋友認識及說出不同的詞彙，促進言語發展，亦能促進親子關係。
道具：
一個袋子、家中常見的物件
玩法：
1/ 家長預先把家中常見的物件收進袋子裡
2/ 再鼓勵小朋友觸摸袋中的物件：「你摸吓？估吓乜嘢嚟？」
3/ 亦可以對話形式引導小朋友形容物件，如形狀、大小、質地等等
趁著孩子放假，家長可以和小朋友玩真實的「煮飯仔」遊戲，以簡單的材料和步驟，一步一步和孩子一起製作美味的食物，從中利用連接詞如「首先」、「然後」，「最後」等等去描述步驟，讓小朋友學會連接的言語技巧。此外，亦可讓小朋友從中了解菜式的製作過程，借機教導他們要珍惜食物。
簡易烹飪： 果醬多士、沙津、雪條、啫喱、阿華田、曲奇、PIZZA…
你有小朋友製作的食物相嗎？大家不妨在留言處張貼吧！
[2022年8月8日，香港] 為鼓勵讀寫障礙學生持續學習，博思會特設「香港金紫荊扶輪社．博思會學生勤到獎」，以獎勵勤學學生，今年共有35名學生獲得殊榮。頒獎典禮於2022年8月7日假大圍東莞工商總會張煌偉小學舉行，並邀得「觀鳥達人」嗚鴉自然教室創辦人關朗曦先生 (Matthew)為分享嘉賓。Matthew於浸會大學視覺藝術系畢業，及後從事藝術及攝影教育工作，近年亦為香港觀鳥會擔任「香港鳥類生態藝術工作坊」導師， 2018年，他與太太成立「嗚鴉自然教室」(Project Crow)，透過知識傳遞，喚起大眾的環保意識。
Matthew在分享中提到，他小時候被診斷有讀寫障礙，唯當時香港社會普遍對讀寫障礙未有認識，亦未有相應的介入及調適服務，令他在求學時期因老師和同學的不理解而感到沒有自信。雖然Matthew在學業上未能取得成功感，但觀鳥的興趣卻為他帶來很多的樂趣。Mathew自六歲開始喜歡觀鳥，認雀鳥的種類及牠們的叫聲比起讀書令他更有成就感，每次到外國旅遊，觀鳥更是他指定的旅遊活動。
到Matthew升讀大學的時候，他發現社會已經對讀寫障礙有一定的認知，老師的態度亦較為開放，老師亦願意與學生討論應試和調適的方法，所以他鼓勵讀寫障礙的學生，如果遇到困難，都可以向老師提出及商量解決辦法。
然而，Matthew認為讀書並不是唯一的出路，希望讀寫障礙的學生不要被社會上的標準所局限：「我們的人生除了讀書以外，可以有更多的意義及可能性，因為這個世界需要不同的人，社會才得以發展和進步。當然，家長對小朋友的支持亦很重要。如果學生想在有興趣的範疇發展，應該多花時間去鑽研，就如我花了十多年的時間去研究和辨認不同雀鳥的聲音一樣。」
博思會執行黃瑞霞女士感謝Matthew的分享：「讀寫障礙人士有正常、甚至是良好的智力發展，傳統學習方式並不完全適合他們，要嘗試幫他們找到適合的學習方法，如採用針對鞏固讀寫認知過程和多感官教學方法，讓他們多看多接觸，藉此可以提升學生的自信心及學習動機；同時也要多加鼓勵，發掘他們的興趣和潛能，讓他們可以發揮所長。」
博思會簡介
博思會為香港註冊慈善機構，於2001年成立，現於九龍及沙田設有兩個學習中心。我們擁有中、英、數及早期讀寫支援的專科教師團隊，並有多位與我們長期合作的臨床心理學家、教育心理學家、職業治療師及言語治療師作為專業夥伴，每年為數以百計的讀寫障礙學童，於課餘或校内提供適切和持續的學習支援、專業評估及治療服務。此外，本會亦定期舉辦家長講座活動，與公衆分享有關讀寫障礙的最新知識及教與學的心得。
博思會為國際讀寫障礙協會 (International Dyslexia Association (IDA)) 的環球伙伴，為現時IDA在香港唯一的會員機構。
【簡單記憶法】英文字母 b d 容易混淆，如何是好?
以下是來自博思會課堂的趣事： 有一天，小朋友興高采烈地告訴老師：「我學懂分辨 b 和 d 了！」 老師好奇問他是如何做到，他說：「哥哥教我，前面有個大肚dum便是 “d” ！」 老師追問：「那 b 呢？」 小朋友驕傲地回答：「後面有個大屁股便是 “b” 啦！」 答後，大家哈哈笑！ — 其實，要記著b、d 英文字，除了以圖像故事化來加強記憶外，也可以利用孩子的雙手作為視覺提示。學習英文的方法變化多端，應該了解孩子不同的喜好及學習風格，以不同活動形式去學習，而非只有單一個方法，讓孩子愉快學習至為重要！ 資料來源：https://bit.ly/3cslyEe 博思會支援讀寫障礙學生 – 課餘支援計劃：
博思會自成為國際讀寫障礙協會全球合作夥伴 (The International Dyslexia Association Global Partners)後，積極與鄰國夥伴互相聯繫及交流心得。 本會的課程及服務經理 教育心理學家 招麗儀女士， 獲邀參與由新加坡讀寫障礙協會(Dyslexia Association of Singapore, DAS) 於2022年6月23及24日舉辦的「第八屆特殊學習困難聯合研討會2022」(The 8th UNITE SPLD Conference 2022)。就有關「及早識別讀寫障礙」(“Don’t wait for your child to fail – The importance of Early Assessment and Diagnosis”) 議題，在研討會與來自亞州各地的成員，分享香港扶持讀寫障礙學童方面的發展進程，以及博思會在此進程中扮演的角色。 論壇中，除了招姑娘的分享之外，來自新加坡、印度及印尼的講者亦分別分享了他們的學習文化、學童的識字年齡及識別讀寫障礙學童的工具等。各地文化雖異，但各人均認同「及早識別讀寫障礙」的重要性。
及早為孩子識別讀寫障礙，
盡早作出支援，能有效提升學習成效！
博思會舊生舊生鄔沛延 (Julia) 患有ADHD(專注力失調) 及讀寫困難，這些障礙其實並不罕見，但卻經常被大眾誤解以及被不當處理。 幸好，Julia 得到媽媽的悉心教育及諒解，使她可以繼續經營優質的生活以及自我實現的人生。 早前她接受商業電台《有誰共鳴》訪問，分享如何和家人相處。
— 第一節 —
01. Scars to Your Beautiful
.
媽咪喺我好細個嘅時候就同爸爸離咗婚，係媽咪一手養大我，所以我同佢嘅感情特別深厚。依家諗返嗰陣時，媽咪對我嘅教育方針已經好超前，佢認為人要趁細個多啲接觸唔同嘅嘢，搵到自己擅長同唔擅長嘅嘢，先至可以發揮到自己嘅潛能。雖然嗰陣我哋冇乜錢，但係佢都好鼓勵我，搵咗好多唔同嘅活動比我參加，例如婦女會、教會或者學校課外活動等等。
媽咪亦都無忘記發展佢自身嘅興趣，佢最熱愛就係朗誦，佢而家甚至成為咗一位好出色嘅朗誦導師。喺佢嘅影響下，我自少就參加咗好多大大小小嘅朗誦或者演講比賽。喺媽咪嘅帶領下，我甚至有幸獲得過兩次全港總冠軍，更試過代表香港、台灣及內地出賽，不過喺光榮嘅背後，其實我係一名患有ADHD嘅小朋友。
以我為例，我同時被診斷有專注力不足、讀寫困難同埋過度活躍症，所以對我呢啲同學仔來講，平日上堂以及功課嘅壓力，係一座難以跨越嘅大山。不過可能媽咪細個已經觀察到我有呢方面嘅問題，佢嘅教育方針就成功令到我喺學業以外嘅地方搵到成就感同自信心。我一路以嚟嘅升學歷史，我嘅學業成績唔係好出色，最多只可以話係中等嘅水平，但係因為我有好豐富嘅得獎經歷，所以學校好願意為我打開大門。
今日我就想同大家介紹 “Scars to Your Beautiful” 呢首歌，其實每一個人或多或少都有對自己唔滿意嘅地方，尤其係同我一樣喺某方面有缺陷嘅朋友。我想同你哋講，唔好因為咁樣而自卑，上天為我哋關咗扇窗，一定會留返對門俾我哋，至於搵唔搵到就要靠你自己嘅努力！Scars to Your Beautiful呢首歌正正就係同我哋講要去愛自己，無論點樣，你都可以活出你自己鍾意嘅人生！
02. 生如夏花
.
剛才我都有提到，我同媽咪嘅感情好深厚，因為佢對我嘅養育以及教育之恩，我先可以有今日嘅成就，跟住落嚟我想介紹一首媽咪最鍾意嘅歌 — 《生如夏花》。呢首歌用咗優美嘅歌詞，表達生命就好似夏花一樣咁燦爛，同時感概生命好短暫。我覺得呢首歌講得幾有道理，的確人生再世我哋就應該要多啲去嘗試唔同嘅嘢，令自己開下眼界，喺認識世界嘅同時，亦都去認識吓自己。
呢一點我就好同意我媽咪以前嘅教育方針，生命真係好短暫，可能聽日就會唔知發生乜嘢事而離開咗… 突發嘅嘢我哋冇辦法預測，我哋可以做嘅就係活在當下。
我希望你哋喺欣賞《生如夏花》歌曲嘅同時，都諗吓自己有冇嘢係一直想做，但又因為各種原因而唔敢去做？再思考下生命咁短暫，比起嗰啲會令你卻步嘅原因，自己係咪應該要再踏出一步，去活出同夏花一樣燦爛嘅人生？咁咪唔會後悔，亦都可以叫做不枉此生囉！
03. 信，寫給15歲的自己
.
或者大家為咗生活而頻撲，好多時已經忘記咗自己嘅初心，甚至可能迷失咗方向，搵唔返自己！跟住落嚟介紹一首日文歌，中文譯名叫《信，寫給15歲的自己》，首歌嘅靈感係嚟自作曲者媽媽搵返作曲者15歲寫比自己嘅一封信，而媽媽就將佢作為生日禮物送返比作曲者。當時作曲者30歲收到呢封信就覺得好感觸，有感而發就寫咗呢一首歌。
我覺得呢首歌除咗好聽之外，更多係回顧返自己年輕時候嘅感覺，令我覺得好吸引。我就喺度諗：其實我而家21歲都算後生，咁不如我又試下寫返封信比自己，等50歲後自己再睇返封信，應該都會有好多好有趣嘅感受！所以我就建議仲係年輕嘅大家可以試吓咁做，記住一定要忍住唔好打開封信，如果唔係就冇意義㗎喇！
對於大朋友，可能佢哋以前冇寫過一封咁樣嘅信，但係我覺得都唔會妨礙你哋去回憶下曾經嘅自己，再睇返依家嘅狀況，諗吓自己仲有冇保留到當初嘅初心？定抑或已經睇唔到當初嘅痕跡？
04. The Nights
.
跟住落嚟我想介紹嘅歌叫The Nights，成首歌都係滿滿嘅正能量，歌詞大概係叫我哋要活在當下，過一個冇遺憾嘅人生。但其實呢首歌嘅演唱者已經喺2018年過咗身，當時佢只得28歲，原本佢係一個充滿天份，大家都睇好佢，欣賞佢嘅明日之星，可惜事與願違，當時嘅佢受到情緒嘅困擾，最後選擇咗自殺身亡…
近年香港受到社會問題同疫情嘅雙面打擊下，唔少人都患上咗唔同程度嘅心理疾病。如果咁啱你都喺度承受咁煎熬，聽到我呢一段說話，我想藉住《有誰共鳴》呢個平台話比你聽，你唔係自己一個人，因為我喺高中嘅時候都被診斷患有焦慮症。
嗰陣時我都有差唔多成一年幾無返過學，對於一名即將考DSE嘅學生來講，實在係一個好沉重嘅打擊。因為高中係備考嘅黃金階段，老師喺呢段時間會教你好多考試技巧同埋重點，但我就喺呢個時候患上焦慮症，只要一有啲壓力，個肚就痛到起唔到床，更加唔使講要返學，所以嗰陣時都算係我人生入面幾黑暗嘅一段時光。我唔只要受到身體上嘅折磨，仲有精神上嘅折磨，因為嗰陣時當我望住媽咪為我好擔心，但係又無能為力嘅樣，仲有嗰啲望落永遠都跟唔上嘅學習進度，都令到我嘅病情越嚟越差。
不過大家又唔駛為我擔心，我依家可以咁輕鬆同大家分享，全因我已經康復喇！由於時間關係，我會喺下一首歌嘅時間再同大家講吓我係點樣康復，依家請大家收聽The Nights呢一首歌先啦！
— 第二節 —
05. 稻香
.
之前我分享到喺高中時所患有嘅焦慮症，其實當時我未有意識到自己真係咁大壓力，只係個肚成日痛咁啫。媽咪當時帶咗我睇好多唔同嘅醫生，但係佢哋都話我心理上其實都冇任何問題。於是我就去咗睇心理醫生，醫生話我可能係心理壓力所引致嘅問題，之後建議我去睇精神科醫生。去到睇精神科醫生，我就如實同醫生講：「我自己意識上又唔覺得有乜嘢壓力，同埋我以前參加比賽嗰陣都好大壓力，但個肚都冇事喎！依家個肚就係咁痛，睇咗咁多醫生都搵唔到病因，我都唔知點算好呀…」
之後醫生就同我講：「其實好多時候呢啲壓力都係無形，你以為你可以承受到嘅壓力，但係你個身體就好誠實咁話俾你聽都係爭啲㗎喇，所以你一定要學識同壓力相處！」當下我聽到時，就覺得好無奈，心諗壓力連我自己都感受唔到，咁我可以點樣避免？唔通我就咁樣一世？我好唔忿氣，同時亦都覺得好無助。情況最差嗰陣，我覺得我同時都患咗抑鬱症，甚至連帶好擔心我嘅媽咪，都因為咁而出現咗情緒問題。
當時我聽到《稻香》呢一首歌，我就好感慨，因為《稻香》呢首歌就係叫我哋珍惜眼前嘅一切，嗰陣時我就同自己講：「其實我都好幸福吖，媽咪為我付出咗咁多，帶比我咁多美好嘅嘢，我唔可以令佢因為擔心我，而繼續消瘦落去，如果唔係我實在太不孝同埋冇仁德喇！」所以我都希望透過《稻香》呢首歌，比到力量你哋，希望你哋都可以因此受到激勵，勇敢堅持去面對種種困難。
06. You know better
.
每個人都有負面情緒，如何消化同面對就係我哋要做嘅嘢。好似我咁，當時我下定決心同自己講，唔可以再因為呢個肚痛而去傷害我愛嘅人與事，所以我冇選擇好似醫生咁建議，同肚痛一齊共存落去，我同自己講，既然醫生都話你生理上冇問題，如果只係心理嘅問題，我應該可以用返心理方法去解決！
之後我就成日同自己個肚傾偈，我當時同自己個肚講：「嗱！我唔知你受到乜嘢刺激係度搞搞震，但係如果唔傾掂數，受苦其實都係我哋自己。我知你想提醒我，叫我唔好有咁大壓力，驚我受唔住吖嘛！但係唔試下又點知呢？你咁樣繼續痛落去，就真係連試都冇得試㗎喇！」嗰段時間我就係用呢個方法去洗自己腦，同時我亦主動去睇好多正面嘅電影，又或者去睇返啲真實嘅成功人士案例，慢慢我就發現，我嘅徵狀越嚟越輕，同埋病發嘅頻率都少咗好多，我開始掌握到我壓力爆煲嗰一點究竟喺邊，當我做嘢feel到差唔多壓力點要爆時，我就同自己講放鬆吓。原來「事在人為」真係得㗎！如果你唔去解決呢個問題，你就會被呢個問題解決！以下呢首歌 “You know better” 就係想鼓勵處於低谷嘅你唔好放棄，其實大家都一齊同你努力緊㗎！加油！
07. 弱水三千
.
剛才都有提到，我會因為壓力而肚痛，後來我開始意識到，當我承受壓力到一段時間，我就應該要停一停，比自己放鬆吓，咁我就唔再有肚痛嘅情況出現。後來我開始接觸到佛學，佢幫咗我好多。其實我自己就冇話會好執着於宗教層面嘅嘢，但係我覺得，如果佢講嘅嘢係有道理，咁點解要同好嘅道理過唔去？我跟住落嚟，我想介紹嘅歌叫《弱水三千》，佢入面參考咗一啲佛家嘅思想，好巧妙利用咗水嘅唔同形態嘅表現，去表達人生不同嘅階段。面對唔同人、唔同嘅事，或者唔同階段，我哋都會有唔同嘅反應同埋諗法，因此我哋唔需要為咗當下嘅事而同自己過唔去，好多時你用唔同角度去睇返同一件事，個感觀已經好唔同㗎喇！就好似我之前咁，因為將成績睇得太重，導致自己患有焦慮症，甚至唔記得咗自己真正擅長同埋熱愛嘅嘢，後來睇開咗，唔單止再冇食藥，開始睇到人生有更加多唔同嘅可能性，了解到讀書真係唔係唯一嘅出路！
其實好多成功嘅人士，都係因為佢哋充分發揮到自己所長，先至可以去到而家嘅高度。雖然道理好似好簡單，但好多時候大家仍然會比情緒影響到，從而失去客觀嘅判斷，繼而鑽牛角尖，形成一個惡性循環。自己痛苦嘅同時，亦會為身邊嘅人帶嚟傷害，所以《弱水三千》呢一首歌就係想同我哋講，唔好俾任何一個形態去控制自己，比情緒去左右，要知道世事無常，只係事在人為！好多時只要唔好執着，睇開啲，然後努力去改善，情況就會慢慢變好㗎喇！喺呢度我都想祝福大家，希望大家搵到自己內心嘅平靜。
08. 世上只有
.
最後我想藉住今次機會，特別多謝博思會呢個慈善機構，唔知大家仲記唔記得，喺節目開始時分享我媽咪以前周圍帶我去搵一啲中心參加各種課外活動嘅？博思會就係專門針對我哋呢啲有特殊學習需要嘅小朋友作出支援嘅一個慈善機構，嗰陣時博思會有好多唔同嘅活動可以參加，例如唱歌、辯論、夾band，仲有中、英、數嘅支援班。要知道我哋呢啲ADHD加上學習困難嘅學生，平時學習真係好難坐定定，仲要可能呢堂交完嘅嘢，下一堂就完全唔記得晒，但係博思會入面啲老師就好有耐性，仲會針對我哋唔同嘅需要，用小班教學嘅模式上堂。喺學習過程中，老師會透過遊戲同獎勵方式去吸引我哋嘅注意，咁我哋就會覺得好好玩，上堂唔再係辛苦嘅事啦！我嘅英文底子都係靠博思會幫我打返好，我仲記得嗰時教我嘅老師叫做Miss Chow！我想多謝佢當時為我嘅付出同埋教導，畢竟嗰陣時我都真係幾曳！所以我想分享《世上只有》作為最後嘅歌。
呢首歌除咗係感謝我媽咪對我一路以嚟嘅陪伴同埋信任，更加係我嗰時喺博思會夾band所學嘅第一首歌，所以對我嘅意義好大㗎！希望大家鍾意啦！
此時此刻，有誰共鳴。
我係鄔沛延，我希望大家可以支持博思會，因為我覺得有一個咁好嘅機構(博思會)專門針對我哋呢啲 (讀寫困難) 特殊學習需要嘅小朋友，去提供一啲幫助係好難得！尤其喺香港呢個填鴨式教育嘅模式下，對於我哋嚟講，真係好痛苦！所以有博思會呢啲機構，提供到針對讀寫困難嘅學習方式俾我哋，對我哋嚟講係一個好難得嘅救命稻草！