唐詩韻老師有兩個身份，一個是SEN學童媽媽，另一個是特殊幼兒工作員，現職在博思會工作，這機構專門幫助讀寫障礙的小朋友。

讀寫障礙是與神經系統有關的學習障礙，小朋友雖然智力正常，但由於腦力發展及功能有別於一般人，以至在聽寫及聽寫文字方面遇上很大困難，出現閱讀理解及寫作上的問題，但要謹記，家長的支持和陪伴對有讀寫障礙的兒童成長與發展是非常重要。

早前唐老師接受商業電台《有誰共鳴》訪問，分享如何與 SEN孩子相處以及工作點滴，以下是詳細訪問內容。

— 第一節 —

我嘅機構是專門幫助讀寫困難的小朋友，負責擔當學前組老師，服務對象係學前階段嘅小朋友，每次上完堂之後我都會同家長分享返小朋友喺課堂當中學習到嘅內容，以及觀察課堂中小朋友有冇一啲特別狀況，因為SEN嘅小朋友都會有一啲情緒，而呢啲情緒會影響到佢哋嘅學習效能。

有時會聽到老一輩嘅家長，初時會質疑：「點解要帶小朋友去上呢啲課堂？我覺得呢啲課堂冇乜用喎！佢而家唔識啫，佢大個啲就會識㗎啦！」「唔使嘥時間同埋錢去上堂啦」等等！當日子一路過去，佢哋就會慢慢睇到小朋友嘅轉變。

如果家長早於學前階段已經發現小朋友嘅情況，繼而幫佢去做評估並初步確診，再讓小朋友去上一啲相關課堂支援，小朋友慢慢成長，由佢幼稚園高班到佢畢業進入小學，對於小朋友之後嘅學習係有好大嘅幫助同效用。作為家長，或者你會覺得佢哋學得好慢，經常學完都唔記得，但我深信將來有一日，小朋友會突然間好似火箭咁上升得好快。剛才我講過陪住小朋友去成長需要多啲愛，自己作為媽媽，喺陪住小朋友嘅成長過程裏面，縱使要去捨棄一啲嘢，如工作、目標等等，但係能夠陪住小朋友成長，我覺得係一件好開心嘅事，因為小朋友喺我哋心目中永遠都係一個小天使。

喺日常工作裏面，有時我會觀察到小朋友或者稍遜喺某啲能力，家長或者暫時未係好接受到小朋友有SEN呢個狀況，當我哋想同家長表達學生嘅情況，溝通都需要一啲技巧。

作為一位媽媽，我都曾經聽過兒科醫生或者從臨床心理學家口中話我嘅小朋友可能有言語障礙，所以我好明白家長係會不太接受呢個事實。作為老師將心比己，都要諗下點樣同家長去溝通，讓家長聽落不太抗拒，俾多啲時間佢去接受SEN嘅狀況同需要。

呢幾年我睇到家長心態上嘅進步，依家嘅家長如果懷疑小朋友有讀寫困難，佢哋無放棄之餘，更會主動幫小朋友尋求相關服務，例如交評估申請表，我十分欣賞佢哋好快就已經消化咗自己小朋友嘅問題，畀小朋友盡快得到支援，呢個係一個好好嘅心態，對於過來人嘅我來講，要接受自己小朋友有SEN嘅狀況，真係需要一份勇氣！

當小朋友有情緒時，佢可能喺屋企或者學校發生過一啲事，當佢踏入博思會門口，我就會察覺到佢同平時有啲唔同，或者以往佢會好開心同我分享佢嘅事，但今日入到嚟就見到佢冇出聲，心情好一般，咁呢啲時候我都會去關心一下佢。我會主動同佢傾偈，唔好一嚟就問佢發生乜嘢事，或者調返轉，我會主動同佢分享今日發生咗嘅事，從而令佢發現到自己有啲唔開心想搵人傾下，疏理一下佢嘅情緒，讓佢心情好返啲。縱使喺課堂上我希望佢哋可以去做我預設咗嘅內容，但當小朋友有情緒時，抽返少少時間比佢去傾吓計，可以牽動到佢之後學習上面嘅效能，我覺得呢點係需要，亦係重要。

喺機構裏面唔單止得我一位老師，仲有其他老師，有時我都會同其他同事交流傾下學生嘅情緒狀況，大家亦會分享自己嘅經驗，睇下點樣幫到學生，希望學生來到嘅時間，可以幫助到佢解決學習上嘅困難之餘，亦都希望將愛俾到佢哋。當佢感受到有愛，有人陪住佢一齊成長，佢自己慢慢都會有一個繼續進步嘅心態！呢個愛唔單只家庭要有，老師比學生嘅愛同樣重要。

陪小朋友去搵支援服務嘅同時，作為家長亦要幫自己打打氣，我哋可以透過類似家長資源中心去搵我哋嘅同路人。當你搵到同路人，你嘅心情就會好舒服，好似我之前喺照顧自己小朋友嘅歷程上，我有時都覺得唞唔到氣，好想同人傾吓，但又怕個啲無SEN問題嘅家長唔知點諗而難以啟齒。但當搵到同路人，例如參與一啲SEN家長小組，情況就會好唔一樣，因為呢度有好多SEN小朋友嘅家長，大家都知道有SEN小朋友嘅心情，可以好暢所欲言同其他家長交流。當你慢慢去接觸唔同嘅家長，發現原來唔淨只得自己一個有相同情況時，你嘅情緒亦會有所調整！我覺得呢一方面對家長支援來講都係好重要！

最後我都希望帶出一個訊息，家長若發現小朋友有SEN，首先唔好覺得係一件難以啟齒嘅事，應該抱著正面嘅心態，就係幫小朋友及早介入，及早畀佢哋有適當嘅支援！在此我想送「紅日」呢首歌比大家，人生裏面係會有高高低低，問題總可以解決！

— 第二節 —

我係一位媽媽，或者我先由媽媽嘅角度去同大家做一個分享。

我有一個小朋友，佢有特殊學習需要，如果聽眾屋企都有好似我哋叫SEN嘅小朋友，大家都會好明白呢個狀況！

仲記得我嘅小朋友去到一歲左右，應該可以發到「爸爸」呢個音，又例如單詞「奶」，佢會叫「奶奶」，佢開始會有一啲意識。我以前喺幼稚園都工作咗一段時間，憑住自己嘅觀察就發現我個小朋友喺講說話上面比同齡嘅小朋友好似有啲慢，手指郁動唔係太多，只係發出「嗯」「嗯」「嗯」咁樣，見佢情況咁樣我就開始教佢，但經過一段時間狀態都好似停滯不前，我哋就開始着緊同埋有啲擔心佢。家長如果有小朋友都知，小朋友會去健康院打一啲疫苗，好好彩嗰邊健康院有姑娘就問我「你對於自己小朋友嘅發展上面有冇一啲擔心？」跟住我都好直言、好坦白就同姑娘講：「有啊」，好快健康院嘅姑娘、健康院嘅醫生就幫我小朋友做咗一個初步嘅評估，佢哋都覺得我小朋友有一啲言語上面嘅問題。

喺呢度我想分享一首歌「歲月如歌」，當我聽呢首歌嘅時候，會諗作為一個家長，我有個小朋友係好開心，但係原來小朋友嘅成長過程當中或會出現一啲狀況，就好似歌詞「天氣不似預期」，所以今日就帶呢首歌同各位分享。

頭先提到我小朋友有言語問題，就轉介佢去評估中心做評估，喺佢兩歲零十個月嘅時候，評估結果就話佢有言語遲緩嘅問題。當時我嘅心情還好，由於我自己過往嘅工作，令到我明白到當家長知道自己小朋友有SEN問題，就要去搵一啲支援去幫助我嘅小朋友，我好相信及早發現、及早戒入可以幫到我小朋友有更大嘅成效，於是我就抱住呢個態度，不斷喺我屋企附近去搵一啲相關嘅資源。

其實喺呢個年齡來講佢仲未正式入學，就算入到去學校亦都要睇嗰間學校本身佢有冇一啲資源去幫我小朋友。正正就喺我屋企附近，好好彩我就搵到一間機構係有一個持續服務嘅親子小組，其中有一個小組就係幫助有言語遲緩、言語困難嘅小朋友，可以比家長陪伴小朋友一齊去上堂。小組嘅導師係一位言語治療師，佢哋會搵能力同年歲相近嘅小朋友夾埋同一組，咁上完堂之後佢又會伴隨著有一啲相應嘅訓練，即家居訓練，我覺得呢樣都好重要。第一可以比家長學習多啲方法去幫助小朋友點樣喺言語上面嘅發展，同埋了解需要注意嘅地方。第二就係可以俾小朋友多一個方法去重溫，對小朋友係有好大嘅幫助。

跟住落嚟呢隻歌叫做陪著你走，點解我會揀呢一首歌，因為我會覺得我雖然知道我小朋友係SEN，但係我自己都希望可以一路陪住佢成長，所以就想同大家一齊分享呢首「陪著你走」

心態好重要！我自己好好彩，屋企人知道小朋友有言語遲緩，大家都會互相扶持。我之前喺一間幼稚園做全職嘅工作，同我先生商量之後，我就決定唔再做全職，一心一意去陪住我小朋友，安排多啲時間喺屋企同佢做家居訓練，例如幫佢重溫句子，可以嘅話將佢融入係生活裏面，例如佢想飲奶，咁可能最初係單詞，跟住就變詞語，將「奶」變做「牛奶」，慢慢去引導佢加長句說話。直至我個小朋友入學，明顯見到理解同表達方面都比同齡嘅小朋友弱，雖然佢而家係咁樣，但唔代表佢將來一直都係咁，只要我陪住佢走呢條路，我覺得總有一日，佢都可以好好成長。

小朋友不經不覺就K3畢業，我真係好開心，因為嗰日言語治療師同佢做完最後嗰份評估，就同我講囝囝喺言語同理解嘅發展都合乎年齡。呢一刻我真係好開心，我同仔仔嘅努力，推動到去做到呢件事。

如果家長真係發現到自己嘅小朋友係有特殊學習需要的話，千祈唔好白白浪費咗啲時間，唔好太遲去幫助你嘅小朋友，更加唔好放棄！在於我作為過來人分享，要趁早喺佢哋細個嘅時候作出支援，總有一日你就會見到曙光同希望，亦都睇到佢有相當大嘅進步。在此送上呢首歌：愛得太遲。

如果言語遲緩落後得比較慢嘅小朋友，其實係會影響到佢嘅社交能力。喺幼稚園階段，裏面嘅老師、職工等等佢哋都係好有愛，當見到小朋友有啲情況嘅時候，佢哋都會好主動走去問小朋友。但係去到另外一階段到小學時，情況就會不一樣，小學要靠佢哋自己，有問題嘅時候要舉手提出，例如佢要鼓起勇氣，舉起隻手同老師講要去洗手間，但係言語遲緩嘅小朋友唔係好識去表達自己，因為講得唔好，令到佢哋更加冇自信心！

去到小學嘅時候，最初頭嗰年，我一路觀察住我個仔仔，睇吓佢認識朋友同社交方面係點樣樣，同老師溝通時會唔會都唔敢講。我小朋友都算好順利咁樣適應咗嗰一年，學校嘅老師都好好，會同我主動去溝通，我亦都會問返老師仔仔同同學仔相處有無啲唔係咁理想嘅地方。我覺得我好好彩，老師話佢哋相處唔錯，仔仔會識得點樣去同佢喜歡或者志趣相投嘅朋友仔一齊玩，喺相處過程裏面亦冇見佢出現爭拗，喺小息或者放學期間，大家亦會互相打招呼，傾吓幾句，咁我就知我小朋友真係長大喇！

仲有之前喺出面嘅一啲服務，甚至我自己喺屋企裏面同佢重溫嘅練習，佢都可以應用返出嚟，呢個係好重要！小朋友有SEN需要嘅時候，大家都需要付出多啲愛，我覺得愛係可以幫助你去解決一啲困難，所以同大家分享呢一首歌：「在世界中心呼喚愛」。

希望各位支持一下博思會！博思會已經成立20年，一直幫助有讀寫困難嘅小朋友，同時亦會資助經濟上有困難家庭嘅學費，想呼籲有心人都可以幫下博思會，讓博思會可以繼續支援有經濟困難嘅一群小朋友。